Samband íslenskra framhaldsskólanema

1. kafli – Nafn og markmið.

1. gr.
Samtökin heita Samband íslenskra framhaldsskólanema, skammstafað SÍF.
Heimili þess og varnarþing er í Reykjavík.

2. gr.
Samband íslenskra framhaldsskólanema eru hagsmunasamtök framhaldsskólanema á Íslandi. Það getur í umboði einstakra aðildarfélaga, sumra þeirra eða allra, farið með samningsumboð og komið fram fyrir þeirra hönd gagnvart stjórnvöldum, atvinnurekendum, skólastjórnendum eða öðrum aðilum.
Samband íslenskra framhaldsskólanema starfar samkvæmt stefnuskrá sem mótuð er árlega á aðalþingi félagsins.

2. kafli – Aðild og aðildarfélög

3. gr.

Nemendafélög í framhaldsskólum, félagsmenn þeirra og þeir iðn- og starfsnámsnemar sem stunda nám á vinnumarkaði geta átt aðild að Sambandi íslenskra framhaldsskólanema.

4. gr.
Einstaklingur sem ekki er meðlimur í nemendafélagi getur fengið einstaklingsaðild að SÍF. Umsókn hans er afgreidd af framkvæmdastjórn og öðlast hann þegar öll réttindi.

5. gr.
Ef nemendafélag óskar eftir að ganga í sambandið getur framkvæmdastjórn veitt því viðtöku til næsta aðalþings eða stjórnarfundar. Þau hafa þar með sömu réttindi og þau félög sem hafa fulla aðild. Á aðalþingi eða stjórnarfundi er svo lagður fullnaðarúrskurður á aðildarumsókn.

6. gr.
Umsókn nemendafélags að Sambandi íslenskra framhaldsskólanema skal aðeins tekin gild berist hún skriflega til SÍF, undirrituð af stjórn nemendafélags. Einnig skal fylgja afrit af lögum félagsins.

7. gr.

Öll aðildarfélög hafa fullt frelsi um sín innri mál, að því gefnu að ekki brjóti í bága við sambandslögin eða samþykktir aðalþinga.

8. gr.
Úrsögn nemendafélags úr sambandinu er aðeins tekin gild berist hún skriflega til SÍF, undirrituð af stjórn nemendafélags og ábyrgðarmanni félagsins.

9. gr.
Stjórn hefur rétt til að víkja aðildarfélagi úr sambandinu ef hún lítur svo á að það hafi gert sig sekt um atferli sem sé sambandinu til tjóns eða vanvirðu, brjóti í bága við lög SÍF eða samþykktir aðalþinga. Leggja skal slíkt fyrir næsta aðalþing, er leggur fullnaðarúrskurð á það.
Brottrekstur kemur þó ekki til framkvæmda nema samþykktur sé með 3/4 atkvæða á löglegum stjórnarfundi, eða 2/3 atkvæða á aðalþingi.
Hvert það félag sem vikið hefur verið úr Sambandi íslenskra framhaldsskólanema missir þegar í stað öll réttindi sín í sambandinu og fulltrúar þess missa þar með umboð til trúnaðarstarfa innan SÍF. Varamenn stjórnarmeðlima skulu taka við stöðum þeirra.
Ef um er að ræða framkvæmdastjórnarmeðlim skal honum gefið svigrúm til að halda stöðu sinni, enda kosinn sem einstaklingur en ekki fulltrúi skóla síns.

3. kafli – Aðalþing

10. gr.
Aðalþing Sambands íslenskra framhaldsskólanema skal kjósa um hvenær næsta þing skal haldið. Framkvæmdastjórn getur breytt dagsetningu en þó með 6 vikna fyrirvara.

11. gr
Aðalþing hefur æðsta vald í öllum málum SÍF. Aðalþing er lögmætt ef það hefur verið löglega boðað sbr. 13.gr. Þingfundur er lögmætur ef  2/3 aðildarfélaga er skráð á þingið og einungis ef 2/3 þingfulltrúa eru mættir. Þegar fundur er settur skal þingforseti ganga úr skugga um að fundurinn sé lögmætur. Ekki er heimilt að vefengja lögmæti fundar sem þingforseti hefur úrskurðað lögmætan og gildir það jafnt þótt fækkað hafi á fundinum.

12. gr.
Aðalþing skal boðað skriflega með minnst fimm vikna fyrirvara. Þá skal framkvæmdastjórn senda aðildarfélögum væntanlega dagskrá þingsins og geta helstu mála, sem fyrir þinginu liggja, eigi síðar en með fjögurra vikna fyrirvara.

13. gr.
Aðalþing skal fara eftir þingsköpum og skal fundum þingsins stjórnað eftir þeim.

14. gr.
Á aðalþingi skulu tekin fyrir öll þau mál er þurfa þykir og sambandið og aðildarfélögin varða. Mál þau og tillögur, sem einstakir menn óska að tekin verði fyrir á þinginu, er æskilegt að senda framkvæmdastjórn eigi síðar en hálfum mánuði fyrir aðalþing og skal framkvæmdastjórn tryggja að mál þau og tillögur komi fyrir þingið. Slík málsmeðferð heftir þó ekki að einstakar tillögur geti komið fram á þinginu.

15. gr.
Í öllum málum ræður einfaldur meirihluti, ef ekki er öðruvísi ákveðið í lögum þessum.

16. gr.
Kjörgengir á aðalþing og í aðrar trúnaðarstöður SÍF eru allir félagsmenn í SÍF, sbr. 2. kafla. Ef félagsmaður hefur huga á að bjóða sig fram í trúnaðarstarf fyrir SÍF en er ekki þingfulltrúi skal hann láta framboð sitt berast til hvatningarnefndar.

17. gr.
Gestum þingsins er heimilt að taka þátt í starfsemi þingsins að fullu, kjósi þeir svo, en þó án atkvæðisréttar. Gestir hafa málfrelsi og tillögurétt.

4. kafli – Aukaþing

18. gr.
Aukaþing skal stjórn kalla saman þegar henni þykir þurfa eða ¾ sambandsfélaganna krefst þess skriflega.

19. gr.
Fulltrúar á aukaþing SÍF skulu valdir á sama hátt og á aðalþing SÍF sbr. 20. gr.

5. kafli – Fulltrúakjör

20. gr.
Formaður og Sífari viðkomandi aðildarfélags eru sjálfkjörnir sem þingfulltrúar.

Formaður hvers nemendafélags er ábyrgur fyrir því að útnefna aðra fulltrúa á aðalþing fyrir hönd síns nemendafélags en kjör þeirra fari á þessa leið:

Hvert aðildarfélag með 500 eða færri nemendum hefur fasta 3 fulltrúa. Eftir það bætast við fulltrúar sem hér segir:

1 fulltrúi fyrir 501-600

1 fulltrúi fyrir 601-700

1 fulltrúi fyrir 701-800

Og 1 fulltrúa fyrir hverja byrjaða 200 nemendur þar á eftir.

Hverju nemendafélagi er leyfilegt að skrá jafnmarga fulltrúa til vara. Varafulltrúar eru kallaðir til ef að til forfalla kemur hjá aðalfulltrúum.

21. gr.
a) Svar við kalli fulltrúa skulu send skrifstofu SÍF í síðasta lagi 14 dögum áður en aðalþing hefst. Kjörbréf skal fyllt út á þingstað áður en þing er sett.

b) Framkvæmdastjórn skal þá skipa þriggja manna kjörbréfanefnd. Skal hún skila áliti
skriflega á setningarfundi þingsins. Aðeins skal þó samþykkja kjörbréf þeirra fulltrúa sem
mættir eru. Ef fulltrúi mætir síðar þá skal bera kjörbréf hans upp sérstaklega. Tilkynna
skal þingforseta tafarlaust komu nýs fulltrúa og skal afgreiða kjörbréf hans strax.

6. kafli – Kosningar

22. gr.
Stjórn SÍF skal kosin úr hópi þingfulltrúa og félagsmanna á reglulegum aðalþingum, til eins árs í senn og skulu kosningar fara fram sem hér segir:

a) Kosið skal í allar stöður framkvæmdastjórnar á aðalþingi.

b) Í stjórn eiga sæti allir Sífarar aðildarfélaga, formaður, ritari, gjaldkeri, alþjóðafulltrúi, forvarnafulltrúi og tveir verkefnastjórar auk kjörinna aðalfulltrúa.

c) Þá skal næst kjósa 5-8 aðalmenn og 3 varamenn.

d) Kosin skal sérstök ráðgjafanefnd skipuð 2-4 fyrrverandi framkvæmdastjórnar-meðlimum.

23. gr.
a) Í byrjun þings SÍF skal þingið kjósa þrjá einstaklinga í hvatningarnefnd þingsins, einn af þremur skal vera sitjandi formaður, æski hann þess. Þó skal formaður ekki sitja í nefndinni hyggist hann bjóða sig fram í trúnaðarstöðu innan sambandsins. Hlutverk hvatningarnefndar er að hvetja fólk og leiðbeina þeim hvernig má bjóða sig fram í stjórn og aðrar trúnaðarstöður á þinginu.

b) Aðrir þingfulltrúar hafa jafnan rétt til uppástungna um menn í stjórn og trúnaðarstöður, þá má þingforseti leyfa örstuttar athugasemdir um það ef hlutaðeigandi telur sig ekki geta tekið kjöri.

24. gr.
Heimilt er að kjósa menn til starfa í stjórn þó svo þeir hafi lokið námi í framhaldsskóla. Slík heimild nær ekki nema til þriggja samliggjandi kjörtímabila. Framkvæmdastjórn skal þó vera skipuð framhaldsskólanemum að meirihluta.

7. kafli – Stjórn

25. gr.
Stjórn samanstendur af sjö manna framkvæmdastjórn, 5 – 8 manna aðalstjórn og Síförum frá öllum aðildarskólum.

26. gr.
Stjórn hefur milli þinga æðsta vald í öllum málefnum SÍF og ber hverjum þeim er trúnaðarstarfi gegnir fyrir sambandið, að hlýða fyrirmælum hennar og úrskurði.

27. gr.
Stjórn er heimilt að víkja trúnaðarmönnum úr starfi, sýni þeir ábyrgðarleysi eða dræma mætingu á fundi. Slík ákvörðun skal lögleg ef samþykkt er af 3/4 stjórnarmanna, annars ógild. Heimilt er að vísa stjórnarmanni úr stjórn ef hann mætir ekki á tvo fundi í röð án þess að hafa boðað lögmæt forföll.

28. gr.
Stjórn situr aðalþing sem um þingfulltrúa væri að ræða, með fullum réttindum. Framkvæmdastjórn SÍF situr aðalþing með fullt málfrelsi og tillögurétt. Meðlimur framkvæmdastjórnar hefur einungis kosningarétt ef hann situr þing sem fulltrúi síns skóla.

29. gr.
Stjórn skal funda sem þurfa þykir en þó ekki sjaldnar en einu sinni hvora önn. Formaður eða ritari boðar stjórnarfund með minnst tveggja vikna fyrirvara. Formanni eða ritara er skylt að boða stjórnarfund ef minnst 10 stjórnarmeðlimir eða 1/3 aðildarfélaga æskja þess. Fundur stjórnar er lögmætur ef löglega er til hans boðað og minnst 15 stjórnarmenn mæta.

8. kafli – Framkvæmdastjórn

30. gr.

Framkvæmdastjórn stjórnar daglegri starfsemi SÍF í samræmi við lög þess, stefnuskrá og samþykktir stjórnarfunda.

31. gr.
Framkvæmdastjórn er heimilt að fela vinnunefndum, er hún kýs, að fara með einstök dagleg verkefni SÍF í tilteknum málum.

32. gr.

a) Formaður boðar framkvæmdastjórnarfundi, leggur fram dagskrá og stýrir fundunum.

b) Ritari skráir fundargerðir og lýsir skilmerkilega öllum ákvörðunum og samþykktum stjórnar jafnt sem framkvæmdastjórnar. Ritari heldur utan um fylgiskjöl hvers fundar og kemur þeim fyrir til geymslu. Ritari skal ætíð setja sig það vel inní mál hverju sinna að hann sé hæfur til að taka við af formanni í forföllum.

c) Gjaldkeri skal í samstarfi við bókara SÍF leggja reglulega fram rekstrarreikninga, kynna fjárhagsstöðu og áætlanir eftir samþykktum framkvæmdastjórnar hverju sinni og vera ráðgjafi framkvæmdastjórnar varðandi styrkveitingar. Gjaldkeri skal bera fram ársreikninga á aðalþingum og stjórnarfundum, auk þess skal hann upplýsa framkvæmdarstjórn um stöðu fjármála á hverjum framkvæmdastjórnarfundi.

d) Ábyrgðamaður alþjóðamála skal sjá um samskipti milli SÍF og annarra samtaka og stofnana erlendis.

e) Ábyrgðamaður forvarnastarfs skal vera fulltrúi SÍF í allri vinnu tengdri þessum málaflokki.

f) Verkefnastjórar skulu vera tveir. Ábyrgð á stærstu verkefnum ársplans SÍF deilist á milli þeirra og skulu þeir sjá til þess að verkefnum sé framfylgt. Verkefnastjóri skipar vinnuhóp í kringum hvert það verkefni sem hann er ábyrgur fyrir. Í hverjum vinnuhóp skulu vera: Verkefnastjóri, tveir úr stjórn SÍF, tvö opin sæti. Opnu sætin mega fara til hvers er aðild á að SÍF, hvort sem viðkomandi situr í stjórn félagsins eða er nemandi eða stjórnarmeðlimur í einhverju aðildarfélaganna.

33. gr.
Framkvæmdastjórn ein hefur heimild til að skuldbinda félagið fjárhagslega.

34. gr.
Framkvæmdastjórn skal funda svo oft sem þurfa þykir. Formaður eða ritari boðar framkvæmdastjórnarfund og skal það gert með minnst tveggja daga fyrirvara. Fundur framkvæmdastjórnar er lögmætur þegar einfaldur meirihluti stjórnar tekur þátt í fundinum.

35. gr.
Framkvæmdastjórn er heimilt að greiða stjórnarmönnum útlagðan kostnað vegna starfa fyrir sambandið.

36. gr.
Framkvæmdastjórn SÍF skal halda minnst 2 fundi á ári með fulltrúum allra aðildarfélaga SÍF og ákveður framkvæmdastjórn fulltrúafjölda félaga hverju sinni.

9. kafli – Sífarar

37. gr.

Hvert aðildarfélag skal útnefna einn fulltrúa, svokallaðan Sífara. Hlutverk hans er að vera tengiliður aðildarfélagsins við SÍF.

38. gr.

SÍF væntir þess af aðildarfélögum að haldnar verði árlegar lýðræðislegar kosningar í hlutverk Sífara auk varamanns.

39. gr.

Sífari gegnir stöðu í stjórn SÍF og er einnig heimilt að bjóða sig fram í framkvæmdastjórn. Hann skal því mæta á aðalþing, stjórnarfundi og aðra boðaða viðburði, ellegar staðgengill hans.

40. gr.

Ætlast er til að Sífari komi sér inn í mál SÍF og taki virkan þátt í starfsemi þess sem kostur gefst enda er honum ætlað að vera forsvarsaðili sambandsins í sínum skóla og skal sjá um að kynna sambandið fyrir samnemendum sínum.

10. kafli – Ráðgjafaráð

41. gr.

Ráðgjafaráð skal skipað fyrrum framkvæmdastjórnarmeðlimum.

42. gr.

Hlutverk ráðgjafa er að viðhalda þekkingunni innan SÍF. Þeir skulu veita framkvæmdastjórn upplýsingar og fræðslu um hvert hlutverk þeirra er, hvað þarf að gera og hvernig best er að fara að.

43. gr.

Ráðgjöfum er ekki skylt að taka þátt í daglegri starfsemi SÍF en æskilegt er að þeir taki fullan þátt í byrjun nýs starfsárs svo ný framkvæmdastjórn njóti stuðnings.

44. gr.

Ráðgjöfum er heimilt að sjá um ákveðin verkefni eða sækja fundi fyrir sambandið fái þeir umboð frá framkvæmdastjórn. Þeim er þá skylt að upplýsa framkvæmdastjórn reglulega um framvindu mála og skulu víkja úr sínum verkefnum telji framkvæmdastjórn betra að annar taki við.

11. kafli – Fjármál

45. gr.
Á þingi skal leggja jöfnunargjald á hvert aðildarfélag og skal það deilt jafnt niður á ferðakostnað þingfulltrúa þeirra aðildarfélaga, sem aðsetur hafa fjarri þingstað.

46.gr
Reikningsár sambandsins skal vera frá 1. september til 31. ágúst ár hvert. Gjaldkeri sambandsins heldur reikninga yfir tekjur og gjöld þess. Reikningar sambandsins skulu í lok hvers reikningsárs lagðir fyrir stjórn endurskoðaðir af löggiltum endurskoðanda. Reikningarnir skulu síðan lagðir fyrir næsta reglulega aðalþing til fullnaðarafgreiðslu.

47. gr.
Leysist sambandið upp, skulu peningaeignir þess leggjast inn á sparisjóðsbók til fimm ára, undir gæslu menntamálaráðuneytisins. Svo og skulu aðrar eignir sambandsins afhentar menntamálaráðuneytinu til varðveislu þar til sambandið hefur verið endurreist.

Ef sambandið hefur ekki verið endurreist að 5 árum loknum skulu allar eignir félagsins dreifast á milli þeirra nemendafélaga sem voru í sambandinu þegar það leið undir lok.  Eignirnar skulu skiptast í samræmi við nemendafjölda nemendafélagsins þegar sambandið leið undir lok.

12. kafli – Lagabreytingar

48. gr.
Lögum sambandsins má aðeins breyta á reglulegum aðalþingum. Skulu viðhafðar tvær umræður um lagabreytingar, þannig að eftir framsögu á þingfundi er heimilt að vísa breytingum til laganefndar og skoðast umræður í laganefnd, sem fyrri umræða. Síðari umræða fer fram á þingfundi og teljast breytingar ekki samþykktar nema 2/3 viðstaddra þingfulltrúa samþykki þær.

a) 22. grein, sem fjallar um kosningar í stjórn má ekki breyta nema með samþykkt 4/5 þingfulltrúa.

b) Tillögur um breytingar á lögum sem aðrir bera fram en stjórn skal berast stjórn tveimur vikum fyrir þing. Komi fram ný lagabreytingatillaga á aðalþingi frá öðrum en stjórn skal fundarstjóri leita  samþykkis þingsins um hvort fjallað skuli um tillöguna. Samþykki þingið undanþáguna skal fjallað um tillöguna eins og um tillögu sem skilað hefur verið með löglegum fyrirvara.

13. kafli – Reglugerðir

49. gr.
Framkvæmdastjórn hverju sinni er heimilt að setja reglugerðir sem skilgreina nánar starfsemi SÍF út frá lögum þessum. Reglugerðir sem stjórn setur öðlast strax gildi og gilda fram að næsta aðalþingi þar sem þær skulu annaðhvort staðfestar eða felldar úr gildi. Reglugerðir sem staðfestar eru á aðalþingi verða þá aðeins felldar úr gildi á öðru aðalþingi.

50. gr.
Stjórn hefur heimild til að leiðrétta stafsetningar-, málfars-, tilvísunar- og innsláttvarvillur í lögum þessum án þess að bera þær breytingar upp fyrir þing enda breytist ekki merking viðkomandi greina.

51. gr.
Lög þessi öðlast þegar gildi, 19. september 2010, Fjölbrautaskólanum í Garðabæ