Samband íslenskra framhaldsskólanema

Efni: 2. fundur 4. stjórnar SÍF

Dagskrá:

• Kosning á fundarstjóra og ritara
• Skýrsla framkvæmdarstjórnar
• Skýrsla framkvæmdarstjóra
• Ársreikningur
• Áfengismælaályktun
• Kosning til gjaldkera
• Ályktanir ræddar
• Kosið um ályktanir
• Aðildarumsóknir
• Önnur mál

Fundur settur 16:40 og gengið til dagskrár

Kosning á fundarstjóra og ritara

Eydís boðin fram til fundarstjóra og engin mótframboð berast og því Eydís kosin sem fundarstjóri. Sigurbjörg boðin fram til ritara og engin mótframboð berast og því Sigurbjörg kosin ritari. Heiða er boðin fram sem varafundarstjóri og vararitari og engin mótframboð berast og því er Heiða kosin sem varafundarstjóri og vararitari.

Eydís fundarstjóri telur mætta og lýsir fundinn löglegan.

Skýrsla framkvæmdastjórnar

Sjá fylgiskjal I

Heiða líkur lestri skýrslu framkvæmdastjórnar og Starkaður frá Verslunarskóla Íslands óskar eftir orði. Hann óskar eftir upplýsingum um nýja námsskrá. Heiða skýrir frá því að enn sé verið að skoða breytingarnar en gerir grein fyrir því að nýtt einingakerfi sé í vinnslu, feiningar. Að auki segir hún frá því að SÍF hafi óskað eftir frekari upplýsingum frá MMR um efnistök nýrrar námskrár. Þá segir hún að með nýrri námskrá sé skólunum gefið aukið svigrúm, og að ný námskrá sé sniðin eftir evrópustöðlum. Rætt er um mætingaskyldu og gert er grein fyrir því af Starkaði að reglur um mætingaskyldu verði líklega settar í hendur einstakra skóla. Þó kemur fram að um sé að ræða tillögur. Heiða gerir grein fyrir því að skólarnir séu ekki skyldugir að taka upp nýjar reglur fyrr en 2013, þó séu skólum leyfilegt að hefjast handa við nýjar reglur nú þegar.

Starkaður biður um upplýsingar um bóksölu SÍF. Heiða gerir grein fyrir markmiði og verkreglum bóksölunnar. Gerir greinarmun á skiptibókasölu og umboðssölu.

Starkaður óskar eftir upplýsingum um aðgengi námsefni á internetinu. Heiða gerir grein fyrir því að gert er ráð fyrir samnýttu og miðlægu kerfi framhalsskólanna. Gert er ráð fyrir að efni væri á pdf formi og að greitt væri fyrir aðgang að kerfinu og sú upphæð færi í að greiða fyrir höfundarlaun. Spurt er um hvort leyfilegt yrði að prenta út efni og Heiða svarar því að það sé undir hverjum nemenda komið að prenta fyrir sig.

Starkaður óskar eftir upplýsingum um starfsmenn bóksölunnar. Heiða svarar því að framkvæmdastjórn hafi gert ráð fyrir framkvæmdastjóra í 60% stöðu og svo starfsmanni bóksölunnar í 40% starfi tvisvar sinnum á ári þegar hún er í gangi.

Spurt er um laun framkvæmdastjóra og hvort þau séu opinber. Svo er, en einnig er gert grein fyrir því að laun framkvæmdastjóra hafa hækkað vegna menntunarkröfu sem sett var fyrir ráðningu nýs framkvæmdastjóra. Þó er tekið fram að starfshlutfall framkvæmdastjóra hafi verið lækkað í 60% stöðu og því munu launaútgjöld SÍF ekki hækka.

Jóhanna biður um orðið og spyr um bóksöluna og styngur upp á því að kynna bóksöluna betur til að auka starfsemi hennar. Rætt er um að SÍF bóksalan sé á Facebook og stungið er upp á því að sá miðill væri betur nýttur. Einnig gerir framkvæmdastjórn grein fyrir því að SÍF prentar út plaköt sem standa skólunum til boða til að auglýsa bóksöluna.

Jóhanna biður einnig um upplýsingar varðandi Söngkeppnina og gistinguna. Bryndís segir að VMA hafi verið opið fyrir því að opna dyr sínar fyrir þátttakendum og áhorfendum. Seinna kom svo upp á að kosið verður um Icesave á sama tíma og vegna þess að VMA sé opinber kjörstaður verði því ekki hægt að nýta þá aðstöðu. Sama má segja um KA heimilið þar sem atkvæðin eru svo talin. Stjórn MA er ekki tilbúin til þess að taka á móti. Spurning er hvort að hægt sé að flytja kjörstað en það er ólíklegt. Búið að að kanna rækilega aðra mögulega staði og eins og er hafa engin vilyrði borist. Fram kemur að nauðsynlegt sé að finna gististað af nefndinni og að viðeigandi aðilar vinni nú hörðum höndum að því að finna gistingu. Stungið er upp á því að haft sé samband við Þórsheimilið vegna gistingar.

Jóhanna biður um upplýsingar varðandi upplýsingar til forráðamanna einstaklinga sem eru undir lögaldri. Fram kemur að skólameistarar hafa nú þegar fengið upplýsingar sendar.

Sagt er frá því að búið sé að semja um verð varðandi skipulagðar rútuferðir frá Reykjavík.

Óskað er eftir upplýsingum um leiðtogaskólann. Bjarnþór skýrir frá þeim fyrirlesurum sem komu og fluttu erindi. Bjarnþór skýrir ennfremur frá því að leiðtogaskólinn hafi verið opinn öllum og hafi verið rækilega auglýstur.

Jóhanna spyr hvenær póstur varðandi leiðtogaskólann hafi verið sendur. Segir að pósturinn hafi borist heldur seint. Einnig kom fram að mögulega sé póstlisti SÍF ekki nákvæmur en Heiða greinir frá því að póstlistinn sé reglulega uppfærður. Jóhanna segir að gæta verði að gefa betri fyrirvara, sérstaklega fyrir framhaldsskóla á landsbyggðinni sem þurfa að gera ráðstafanir. Fleiri athugasemdir berast varðandi betri fyrirvara á póstum með upplýsingum og fundarboðum og er fallist á að gæta betur að því að gefa viðeigandi fyrirvara á námskeiðum og fundum.

Sigurbjörg tekur til máls og lætur af fundarritun. Heiða tekur við fundarritun.

Skýrsla framkvæmdastjóra

Sjá fylgiskjal II

Ársreikningur

Sjá ársreikning (fylgiskjal III)

Þengill spyr afhverju fulltrúaráðsfundur kostaði 1.3 milljónir samkv. bls 8, stjórnun og umsýsla. Framkvæmdastjórn býðst til þess að komast að svarinu og senda tölvupóst.

Þengill spyr út í kaffikostnað. Lofað að hann hafi lækkað.

Þengill spyr út í bls 19, lið 14. Kostnað við innbú, áhöld og innréttingar. Óvitað hvað veldur þessu.

Þengill spyr út í leigukostnað. Segir að óþarfi sé að SÍF sé í Hinu húsinu, á besta stað í bænum. Það sé ekki nægilega aðgengilegt nemendum. Virðist mælast til að SÍF flytji í ódýrara húsnæði. Spyr út í mun á milli ára sem útskýrist af því að SÍF skipti um skrifstofu og deilir henni nú með LÆF.

Sigurbjörg bendir á að aðstaðan í Hinu húsinu sé mjög góð. Mikil samskipti séu á milli þeirra sem eru í Hinu húsinu. Við fáum m.a. aðstöðu frítt til að halda ýmsa viðburði.

Sigurbjörg segir hvað LÆF, Landssamband æskulýðsfélaga, er.

Þengill spyr hvort kostnaður hljótist af utanlandsferðum. Því svarað neitandi. Einstaka sinnum 50 evrur í þátttökukostnað.

Þengill bendir á lið 8 þar sem stendur að 500þús kall fari í stjórnarlaun. Bendir á að þetta teljist upp í 5.8 milljónir í laun, rekstrarkostnað og annað. Heiða segir að oftast séu ráðnir inn starfsmenn til að hjálpa til á þinginu.

Starkaður bendir á “annar kostnaður” á bls 8. Eydís segir að það sé líklegast endurgreiðsla flug.

Þengill bendir á 227.069 kr undir liðnum erlent samstarf, ferðakostnaður bls 8 frá árinu 2008 – 2009. Óljóst hvaðan það kemur.

Þengill ítrekar hversu miklu var eytt í laun og fleira. Það útskýrt með óhóflegri eyðslusemi þáverandi framkvæmdastjóra.

Bryndís spyr út í útgáfukostnað bls 8. Það er Kveikjum á perunni bæklingurinn.

Starkaður bendir á bls 7, aðrar tekjur, bóksala. Það er svigi utan um tölurnar sem táknar tap sem stenst ekki. Heiða bendir á að við erum nýbúin að fá skjalið og eigum eftir að komast að því hvað allir liðir tákna. Sibba talar um nýtt bókhaldsfyrirkomulag.

Starkaður, bls 6, skuldir og eigið fé hækkar á milli ára. Það útskýrt með meiri hagnaði, sýnir innistæðu inn á reikning þegar rekstrarári líkur.

Þengill spyr út í útgjöld í matarkostnað, t.d. þegar farið var á Sólon. Útskýrt hvernig það var ódýrari kosturinn en SÍF sér stjórn alltaf fyrir mat á slíkum viðburðum.

Sigurbjörg bendir á að bókhaldið verði mun skýrara næsta ár með nýjum bókhaldslyklum og öðru fyrirkomulagi.

Þengill spyr hvort við séum með allar kvittanir og geti sent til endurskoðanda. Sibba bendir á að bókarinn komi nú í hverjum mánuði og fari yfir allt. Þengill mælir með að allar kvittanir og gögn verði send til endurskoðanda til að athuga hvort þáverandi framkvæmdastjóri hafi verið að borga sér meira en leyfilegt er.

Sigurbjörg býðst til þess að skoða hvern lið fyrir sig.

Þengill, Starkaður og Ómar mæla með þvi að fyrrum framkvæmdastjóri verður kærður fyrir ólöglega eyðslu o.fl.

Heiða lætur af fundarritun og Sigurbjörg tekur við fundarritun.

Áfengismælaályktun

Heiða gerir grein fyrir því að MMR hafi óskað eftir ályktun um áfengismæla á skemmtunum framhaldsskólanna. Heiða les áfengismælaályktun.

Heiða útskýrir að markmiðið hafi verið að rita ályktunina á formlegann máta.

Starkaður hefur beðið um orðið og bendir á að í Verslunarskólanum sé málum háttað þannig að í skólanum sé hægt að vinna til verðlauna með því að mæta á skemmtanir án áfengis. Heiða bendir á að SÍF mæli einmitt með slíku umbunarkerfi í ályktuninni.

Starkaður spyr ennfremur hvort að hægt sé að krefja nemendur um að blása í mæla. Heiða svarar að ef nemandi neiti að blása þá megi vísa honum út af skemmtun.

Mímí segir frá því að á skemmtunum VMA  séu nemendur oft látnir blása í mæla ef þeir fara út í hléum eða pásum.

Heiða gerir grein fyrir því að SÍF fordæmi ekki notkun áfengismæla en að skýrt sé að þeir væru notaðir sem úrskurðunarvald.

Jóhanna spyr hvort að meining framkvæmdarstjórnar SÍF með ályktuninni sé að meina skólastjórnendum að taka út ákveðinn hóp og krefja sá hinn um að blása. Heiða segir að SÍF fordæmi að ákveðnir hópar eða einstaklingar sé sérstaklega teknir út.

Þengill spyr hvort að ekki sé hætta á því að skólarnir muni taka upp á því að nota áfengismæla á alla nemendur á skemmtunum. Heiða bendir á að við munum ekki ná ályktuninni án þess að koma til móts við forvarnarfulltrúa og skólastjórnendur. Aukinheldur ítrekar hún að SÍF fordæmi notkun áfengismæla í sinni núverandi mynd og greinir frá því að það sé skoðun framkvæmdarstjórnarinn að ekki muni gefast vela ð fordæma notkun mælanna með öllu, þannig næst enginn árangur.

Heiða bendir á að mættir megi koma með tillögur á breytingum á ályktuninni.

Bryndís biður um frekari útskýringar á svokölluðum svörtum listum. Heiða segir að ályktunin geri grein fyrir því að SÍF telji vænna að umbuna jákvæða hegðun, frekar en að refsa. Einnig bendir hún á að SÍF telji að skólarnir ættu að bjóða upp á tækifæri fyrir einstaklinga að bæta ráð sitt. Spurt er þá hvort að skólunum verðir gefnar frjálsar hendur til þess að ákvarða umbundarkerfi.

Starkaður bendir á að refsing fyrri ranga hegðun hafi gefist honum persónulega vel. Hann nefnir dæmi um svokallað ballbann sporni við því að fólk mæti ölvað á böll því að það vill ekki missa af næsta balli á eftir.

Kosið um áfengismælaályktun

Fundarstjóri telur kjörgengna sem eru 12. Samþykkir eru 12 og er ályktunin því samþykkt einróma.

Kosning á gjaldkera

Heiða kemur með þá tillögu að það verði kosið um það að framkvæmdarstjórnin hafi umboð til þess að skipa gjaldkera þar sem engin framboð hafa borist. Heiða vísar í lög SÍF sem mæla ekki á móti því að framkvæmdarstjórnin skipi gjaldkera úr röðum stjórnarmeðlima

Samþykkir eru 12 og því er tillagan samþykkt.

Ályktanir ræddar

Eydís óskar eftir því að hver vinnuhópur geri grein fyrir því ferli sem leiddi að ályktun hvers hóps fyrir sig. Heiða stingur upp á því að kosið sé um ályktanir að kynningum loknum í stað þess að kjósa um allar ályktanir á sama tíma.

-Ábyrgð skólameistara.

Bjarnþór kynnir vinnuhóp um ábyrgð skólameistara. Hann greinir frá því að hópurinn hafi skoðað lögin . Bjarnþór les upp ályktun vinnuhópsins (sjá fylgiskjal IV).

Heiða spyr hvort að ályktunin feli í sér að skólameistari að taka fjárhagslega ábyrgð en muni þó ekki skipta sér að fjármálum nemendafélaga.

Starkaður svarar Heiðu á þann veg að skólameistari beri fulla ábyrgð en að hópurinn telji það óraunhæft að reyna að breyta þessari ábyrgð. Þengill bætir við að án þessarar ábyrgðar muni lánstraust nemendafélaganna mögulega þverra. Hann segir að þeir telji að ábyrgðin ætti ekki að vera í höndum skólameistara en þó sé það nauðsynlegt eins og staðan er í dag.

Þengill bendir á að skólameistari þurfi einungis að beita valdi sínu ef nemendafélögin lendi í fjárhagslegum vandræðum sem þau ráða ekki við lengur.

Fannar spyr þá hver ákveði hvenar nemendafélögin ráði ekki lengur við mál sín.

Þengill nefnir dæmi um skuldavandræði nemendafélags Verslunarskóla Íslands en staðan var það alvarleg að skólinn þurfti að leysa nemendafélagið undan skuldabögglum sínum.

Jóhanna segir frá háttum innan síns skóla en segir að skólastýra gefi sér of mikið vald að þeirra mati. Hún hafi tekið ákvarðanir án samráðs við nemendafélagið.

Þengill bendir á að hann telji að lög gefi skólameistara vald yfir skemmtunum sem eru ekki haldin á vegum skólans ef ákveðinn fjöldi nemenda úr þeim skóla komi saman á sömu skemmtun.

Heiða biður um orðið og segir að við ættum auðvelt með að tala fyrir lýðræðislegu stjórnarfari innan skólans. Hún segir að skólameistari ætti ekki að vera einvaldur innan skólans.

Jóhanna lýsir yfir áhyggjum á stöðu innan síns skóla. Fundarmenn benda henni á að nýta SÍF sem advokat, en Jóhanna segir að líklega muni nemendafélagið reyna fyrir sér í einrúmi áður en kallað verði á aðstoð SÍF.

Heiða tekur að sér að gera breytingartillögu að ályktun vinnuhóps um ábyrgð skólameistara.

Engar fleiri athugasemdir berast og því tekur næsti vinnuhópur til máls.

-Lífsleikni

Svandís tekur til máls og ræðir ferli vinnuhópsins. Hver aðili ræddi stöðu lífsleikni innan síns skóla og síðan ræddi hópurinn um þarfar úrbætur.

Atli les ályktun vinnuhópsins (sjá fylgiskjal V).

Starkaður spyr hvað LÆF sé. Það er útskýrt. Hann spyr einnig afhverju hópurinn telji að lífsleikni skuli vera sú sama í grunninn á landsvísu. Hópurinn svarar að það sé einungis grunnurinn skuli vera sá hinn sami, það séu ákveðnir þættir sem allir þurfa að kunna.

Mímí vekur athygli að í lífsleikni skuli vera viðamikil kynning á allri þeirri þjónustu sem skólinn býður upp á. Hún leggur til tillögu að þessum þætti verði bætt inn.

Bryndís spyr hvort að nægjanleg áhersla sé lögð á kynfræðslu og hópurinn svarar að kynfræðsla falli undir kynheilbrigði í áherslulið 1.

Starkaður lýsir ánægju sinni yfir tillögunni en segir að hans persónulega skoðun sé að skólarnir hafi fullt vald til að hanna áfangann eftir sínu höfði.

Hópurinn svarar að í námskrá komi fram að mikið svigrúm sé gefið og því geti skólarnir hannað áfangann að mikli leiti en þau telja þó að mikilvægt sé að nemendur hljóti í grunnin ákveðna færni sem eigi við flesta einstaklinga.

Tóti biður um orðið og spyrt hvort að feiningar muni ekki breyta námskrá og því gæti lífsleikni fallið úr námskrá. Heiða svara að mögulega sé hægt að óska eftir því við MMR að lífsleikni eigi að halda sem kjarnáfanga.

Jóhanna segir frá því að áhersla hópsins á geðheilbrigði hafi sprottið að miklu leiti vegna persónulegrar reynsu en hún segir að innan síns skóla hafi borið á mikilli þörf á umræðu og úrræðum.

Fundarstjóri biður um fleiri athugasemdir eða breytingartillögur.

Vinnuhópur stingur upp á því að skilgreina betur áherslulið 1.

Mímí segir að ályktunin verði að vera ítarlegri svo enginn liður gleymist eða sé opinn til umræðu.

Heiða kemur með þá tillögu að orðalagi ályktunarinnar verði breytt með breytingartillögu eftir að allar ályktanirnar hafa verið kynntar.

Engar athugasemdir berast og því tekur næsti vinnuhópur til máls.

-Aðstaða innan skóla.

Fannar kynnir hugmyndavinnu hópsins.

Bryndís les upp ályktun hópsins (Sá fylgiskjal VI).

Þengill biður um orðið og segir að ályktunin sé góð en segist efast um fjárlög geri ráð fyrir þeirri þjónustu sem ályktunin kalla á. Hann nefnir skóla sinn, MR, sem dæmi en segir að þar sé hart skorið niður og t.d. sé ekki boðið upp á kennslu í jarðfræði.

Eydís segir að það sé ekki á ábyrgð SÍF á sjá fyrir fjármagni heldur að lýsa yfir kröfum nemenda.

Þengill segir að ekki sé mögulegt að ráða inn fleiri námsráðgjafa meðan kennarar séu látnir láta af störfum vegna niðurskurðs.

Tóti spyr hvort að ályktunin gerir ráð fyrir því að kennarar og nemendur deili reynslusögum. Hópurinn segir að það sé ekki reyndin, heldur að utanaðkomandi aðilar séu fengnir til þess að deila sögum sem gætu höfðað til nemenda.

Tóti spyrt hvort að jafningjafræðsla sé vel liðin innan skólans. Eydís segir að ályktunin geri ekki endilega ráð fyrir jafningjafræðslu Hins Hússin heldur að jafningjar frá hinum ýmsu reynsluheimum ræði við hópinn.

Ómar talar um næringu innan skólanna. Hann gagnrýnir einkarekstur matsala innan skóla. Hann stingur upp á því að reksturinn ætti að vera rekinn af ríkinu til þess að tryggja heilsusamlegar máltíðir.

Heiða bendir á að þessi vinnuhópur hafi átt að hafa HEF í huga. Hún útskýrir verkefnið. Hún segir að hluti af verkefninu sé að taka fyrir matarræði/nærringu innan skóla, þ.á.m. mötuneyti. Hún segir að nú þegar sé verið að taka mötuneytið í Flensborg í gegn. Þar er möttuneytið einkarekið. Þó hafi gefist vel að semja um og hanna matseðil sem býður upp á holla og hagstæðar máltíðar.

Elías segir frá IH þar sem búið er að banna sælgæti og gosdrykki í mötuneyti skólans. Hann segir að nemendur leiti frekar í sjoppur í nágrenni skólans bæði vegna slaks vöruúrvals og verðs í mötunneyti.

Starkaður ræðir ennfremur matarræði í skólum og gefur dæmi um skóla í Finnlandi en þar borgar ríkið fæði fyrir nemendur í grunn- og framhaldsskólum. Hann segir að af eigin reynslu hafi þetta gefist vel. Hann segir að þetta sé kannski óraunhæft hér á Íslandi.

Starkaður segir einnig að 1 námsráðgjafi á hverja 200 nemendur sé mögulega of mikið. Hann, og fleiri taka undir, að í sínum skóla anni námsráðgjafar eftirspurn. Bryndís segir að hópurinn hafi hugsað sem að námsráðgjafinn ætti að bæta þjónustu sína, ekki auka þjónustuna í sinni núverandi mynd. Svanhildur segir að í VMA séu 2 námsráðgjafar fyrir 1300 nemendur og að þeir anni ekki eftirspurn. Eydís bætir við að þessi tala, 2 á hverja 200, sé þó einungis hugmynd. Bryndís bætir ennfremur við að hópurinn vilji bæta við þá þjónusu sem námsráðgjafinn veitir, þ.e. rýmka starfssvið þeirra.

Jóhanna spyr hvort að hópurinn geri ráð fyrir að boðið sé upp á aukatíma í ákveðnum greinum eftir eftirspurn eða hvort að það sé skylda að bjóða upp á þá óháð eftirspurn.

Mimi bætir við að í VMA sé verið að reyna að bjóða upp á slíka aukatíma innan viðtalstíma kennara. Hún segir að þetta sé vel nýtt og gefist vel. Málið fer í endurskoðun eftir þessa önn.

Elías spyr um hjúkrunarfræðing innan skóla. Honum segir að ekki sé boðið upp á hjúkrunarfræðing innan skólans, og segir að slys í sínum skóla væru oftast af þeim toga að leita þurfi á slysamóttöku. Heiða svarar að hann ætti að senda fyrirspurn á skólastjórn sína því að skólinn er skyldugur að bjóða upp á þessa þjónustu eða hafa samning við stofnun sem mun sinna þjónustunni.

Ómar segir að sálfræðihjálp innan síns skóla sé í því formi að sérstaklega fyrir próf sé henni vel sinnt og nemendum boðið upp á ráðgjöf t.d. varðandi prófkvíða.

Johanna segir að innan síns skóla viti nemendur að það sé námsráðgjöf í boði en viti ekki að þeir geti leitað þangað með fjölbreyttari vandamál en t.d. val á námi.

Þengill mun bæta við breytingarályktun í næsta hléi.

Breytingatillaga frá Þengli: bæta við “SÍF leggur til að banna gróðamiðaða matvælasölu.” Breytingatillaga á breytingatillögu: “SÍF leggur til að matsala innan skóla sé ekki viðhöfð í gróðaskyni” Breytingatillaga á breytingatillögu samþykkt einróma.

Breytingatillaga frá Bryndísi á aðstöðu innan skóla. “Lagt er til að skólinn hafi reglulegt sjálfsmat þar sem skoðanir nemenda eru teknar gildar og skólinn endurskoði starfsemi sína í samræmi við það. Lagt er til að hluti af lífsleiknikennslu sé skyndihjálp og að nýjir nemendur hafi allir grunnþekkingu á því sviði.” Samþykkt einróma.

Kosið um ályktun um aðstöðu innan skóla í heild sinni. Samþykkt einróma.

Breytingartillaga Heiðu á ábyrgð skólameistara samþykkt einróma. Kosið um ályktun um ábyrgð skólameistara. Samþykkt einróma.

Breytingartillaga Svanhildar á lífsleiknikennslu samþykkt einróma. Ályktun um lífsleiknikennslu samþykkt einróma.

Allar ályktanir samþykktar í heild sinni einróma.

Kosið um aðild MK að SÍF. Samþykkt einróma. MK velkomið í sambandið.

Kosið um aðild MA að SÍF. Samþykkt einróma. MA velkominn í sambandið.

Heiða leggur fram tillögu þess efnis að næsta aðalþing verði haldið frá fimmtudegi til laugardags. Það lýsi sér þannig að fulltrúar utan af landi geti komið sér í Reykjavík á fimmtudagskvöldi eða snemma á föstudegi. Þing hefjist um hádegisbil á föstudegi og standi fram á kvöld. Hefjist aftur á laugardagsmorgni fram til kvölds þegar þinghóf tekur við. Engin dagskrá sé því á sunnudeginum. Vel tekið í tillöguna.

Stjórnarfundi slitið.