Samband íslenskra framhaldsskólanema

Ályktanir 4. stjórnar SÍF

Samþykkt á stjórnarfundi 30. október 2010 í Menntaskólanum við Sund

Forvarnardagur

Fyrsti stjórnarfundur fjórðu stjórnar SÍF ályktar svo að forvarnardagur skuli haldinn á virkum degi í mars 2011.

Forvörnin í ár verður kannabis neysla framhaldsskólanema.

Fyrir forvarnardaginn verður búið til myndband sem dreift verður á internetinu og sent á sífara allra nemendafélaganna. Aðaláhersla myndbandsins verður kanabis neysla út frá sjónarhorni framhaldsskólanema og fræðslan á að einblína á skammtímaáhrif efnisins á neytanda.

Eftirtaldnir aðilar samfélagsins ættu að koma fram: Jón Gnarr, íþróttamaður sem talar um metnað, námsmaður sem hefur fundið fyrir pressu að reykja, einhver aðili sem krakkar líta upp til, og er á þeirra aldri, sem segist finna fyrir þessu í kringum sig en hefur ekki áhuga og einhver sem hefur prófað og ekki líkað við vímuna.

Áhrifamiklar tölur ættu að koma fram sem væru jafnvel yfirfærðar yfir á menntaskólana, algengar ranghugmyndir leiðréttar og staðreyndir settar fram.  Nálgunin mun vera út frá eftirtöldum punktum: Vinamissir, peningaeyðsla, metnaður minnkar, fjölskyldutengsl minnka, framtaksemi minnkar sem gerir einstaklinginn að verri samfélagsþegna, tilfinningar dofna og athugað verður hvort sjálfsvígstíðni passi inní myndbandið.

Dagurinn verður unninn í samstarfi við aðila eins og Lýðheilsustöð, jafningjafræðsluna og læknanema. Við viljum mennta kannski 20 manna hóp um áhrif kannabis neyslu. Þessi hópur mun fara í ákveðna skóla og vera með fræðslu fyrir stærri og minni hópa.

Myndbandið skal vera sýnt í öllum skólum hvort sem fólk úr þessum valdna hópi kemur og sýnir það eða hvort Sífari þurfi að sýna það.

Um kvöldið verða stórir tónleikar haldnir á höfuðborgarsvæðinu. Stefnt er að því að hafa tónleikana ókeypis fyrir menntaskólanemendur. Uppistandarar munu vera kynnar á tónleikunum. Allt verður gert til þess að fá mikla umfjöllun um daginn í fjölmiðlum og tónleikarnir verða auglýstir vel. Sífarar og stjórnir nemendafélaganna verða að gera allt sem í þeirra valdi stendur til þess að auglýsa atburðinn. Reynt verður að fá fólk til þess að  gefa hluti eins og smokka á tónleikunum. Smokkarnir verða merktir SÍF. Hugmyndir eru komnar að hljómsveitum til þess að spila.

Mælst verður til þess að önnur landsbyggðarfélög skipuleggi líka atburði um kvöldið.

Innritunarreglur í framhaldsskóla

Fyrsti stjórnarfundur fjórðu stjórnar SÍF ályktar svo að breyta þurfi innritunarreglum í framhaldsskóla.

Í fyrsta lagi þarf að afnema hverfaskiptingu því að hún mismunar fólki eftir búsetu en ekki námsárangri. Núverandi kerfi dregur úr sérstöðu skólanna. Einnig dregur það úr námshvata þeirra nemenda sem sækjast eftir því að fara í sína hverfaskóla vegna þess að nemendur þurfa ekki að sýna jafn góðan árangur og aðilar úr öðrum hverfum til þess að komast inn. Þó að ríkinu sé skylt að veita nemendum pláss í framhaldsskóla til 18 ára aldurs er óásættanlegt að innganga í skólana fari eftir búsetu (þeim grunnskóla sem nemandi útskrifast úr) en ekki námsárangri.

Í öðru lagi þarf að setja samræmt námsmat aftur á laggirnar til þess að einkunnir nemenda á landsvísu séu samræmdar. Skólaeinkunnir eru ekki alltaf marktækar því þær geta grundvallast á allt öðrum þáttum en raunverulegri kunnáttu, t.d. huglægu mati kennara eða því að grunnskólinn vill að nemendur sínir komist í góða framhaldsskóla. Samræmdu prófin eru þung en þau undirbúa líka nemendur fyrir erfið próf á komandi árum sem svipa mikið til lokaprófa í framhaldsskólum.

Umræðuhópurinn kom með eftirfarandi tillögur að mögulegu innritunarkerfi fyrir framhaldsskóla: Nemendur skulu þreyta samræmd próf til þess að samræma einkunnir. Eftir það sækja þeir um framhaldsskóla og tekur framhaldsskólinn inn nemendur eftir meðaleinkunn úr samræmdum prófum og skólaprófum. Skólinn skal þó skilja eftir ákveðið mörg skólapláss (t.d. prósenta af heildafjölda).

Framhaldsskólarnir skulu svo hafa inntökupróf fyrir nemendur sem voru á einkunnabili rétt fyrir neðan inntökueinkunn. Ef inntökueinkunn er t.d. 8,4 fá nemendur með einkunn á bílinu 7,9 til 8,4 að þreyta próf. Sérstaklega skal tekið tillit til námsörðugleika nemenda í þessum inntökuprófum. Skólinn ákvarðar síðan hvernig inntökuprófum skal háttað, eftir þeirra hentisemi og námsvísi.

17. nóvember

Fyrsti stjórnarfundur 4. stjórnar SÍF ályktar svo að mikilvægt sé fyrir framhaldsskólanema að geta komið saman og lýst yfir skoðunum sínum á friðsamlegan hátt.

Í ljósi þess að mikill niðurskurður er í samfélaginu í dag, höfum við ákveðið að halda viðburð þann 17.nóvember, alþjóðlegan dag námsmanna.
Viðburður þessi mun vera haldinn í þeim tilgangi að vekja athygli framhaldsskólanema sem og þjóðarinnar á þeim niðurskurði sem er í menntakerfinu og viljum við ekki að hann muni bitna á okkar menntun.

Við erum framtíðin og það að menntun okkar slakni þýðir einfaldlega það að við verðum ekki nógu undirbúin eða hæf fyrir átök og hindranir á komandi árum.

Því viljum við fá sem flesta framhaldsskólanema til að ganga út úr skólastofum sínum 17. nóvember næstkomandi klukkan 13:45 og koma saman í þeim tilgangi að efla samstöðu þeirra.

Viðburður þessi á að vera skemmtilegur en um leið fræðandi og upplýsandi, reynt verður að hafa skemmtilega uppákomur og senda skýr skilaboð um hvers vegna við séum saman komin. Einnig væri gaman að fá reynslusögur frá nemendun eða öðrum aðstandendum og segja frá því hvernig niðurskurður hafði haft áhrif á líf þeirra.

Reynt verður að fá kennara og aðra meðlimi samfélagsins til að taka þátt og sýna okkur framhaldsskólanemum stuðning.

Nám er vinna og því teljum að við eigum ekki að þurfa að borga meira til að stunda hana eftir því sem niðurskurður eykst í menntakerfinu.

Við vonum að atburður þessi muni efla samstöðu okkar að við getum staðið saman til að berjast fyrir bættum kjörum okkar framhaldsskólanema.

Andleg og líkamleg velferð framhaldsskólanema

Stjórnarfundur fjórðu stjórnar SÍF ályktar svo að andleg og líkamleg velferð nemenda hafi mikil áhrif á námsárangur.

Virðing

Við teljum virðingu við framhaldsskólanema ábótavant. Gagnkvæm virðing í skólasamfélaginu er nauðsynlegt fyrir jafnvægi og gott starfsumhverfi. Við teljum að orð nemenda og skoðanir ættu að hafa meira vægi, sérstaklega þegar kemur að málefnum er þá varða. Á þá ætti að vera hlustað þegar meta á gæði kennara, kennslu o.fl. og skoðanir þeirra teknar til greina.

Námsráðgjöf og persónuleg þjónusta

Við teljum námsráðgjöf mjög mikilvægan þátt í skólasamfélaginu. Starf námsráðgjafa er mikið og gott en undirstrika þarf nauðsyn persónulegra, en ekki staðlaðra, lausna. Æskilegt væri að fjöldi námsráðgjafa í skólum væri í samræmi við fjölda nemenda. Við viljum hvetja námsráðgjafa til að vera sýnilegri og kynna nemendum betur hlutverk námsráðgjafa og þá þjónustu sem þeir geta veitt.

Þar sem framhaldsskólar teljast uppeldisstofnanir teljum við nauðsynlegt að þeir sinni því starfi að öllu leyti. Ef upp koma vandamál hjá nemendum teljum við skyldu skólans að aðstoða nemandann og beina honum í rétta átt frekar en að firra sig allri ábyrgð og t.d. vísa honum úr skólanum.

Samræmd kennsla

Við teljum að kennarar mættu eiga í meiri samskiptum sín á milli með það í huga að samræma kennslu sína. Þeir ættu að leitast við að veita nemendum jafnt verkefnaflæði til að draga úr skyndilegu álagi. Slíkt gæti komið í veg fyrir að óvenju mörg próf lendi á sama degi. Einnig teljum við kennslu kennara mjög mismunandi og oft ábótavant. Með samráðsvettvang skapast aðstæður fyrir kennara til að ræða kennsluaðferðir og deila reynslu sinni með það í huga að kennslan verði fjölbreyttari og nái betur til nemenda.

Forvarnir og fordómar

Við teljum forvarnarfræðslu hafa sýnt árangur og styðjum áframhaldandi fræðslu þrátt fyrir að við teljum að það þurfi að endurskoða hana og gera áhrifaríkari. Inn í það kemur að stuðlað sé gegn fordómum, einelti og öllu öðru sem kemur að mismunun. Allir ættu að vera jafnir óháð kynferði, kynhneigð, kynþáttum, trú, fötlun eða öðrum persónulegum einkennum.

Hreyfing

Við teljum að endurskoða þurfi íþróttakennslu í framhaldsskólum. Ef nemendum gæfust betri tækifæri til að hafa áhrif á kennsluna og verkefni tímans hefðu þau meiri áhuga og nytu hreyfingarinnar betur. Það gæti ýtt undir þátttöku í skólaíþróttum og bætt viðhorf gagnvart þeim sem og heilbrigðum lífstíl. Bóklegar íþróttir gætu einnig tekið betur á almennum heilbrigðum lífstíl.

Mataræði

Við teljum að hollur matur mætti vera aðgengilegri í framhaldsskólum til að stuðla að heilbrigðu mataræði. Við styðjum því verkefnið Heilsueflandi framhaldsskóli og teljum að fylgjast eigi með að það gangi eftir.

Klukkan

Við teljum að það geri þjóðinni gott að laga klukkuna þannig að við fylgjum réttu tímabelti. Við teljum að sé það gert muni það bæta andlega vellíðan Íslendinga til muna. Andleg heilsa og líðan þjóðarinnar ætti að vera ofar í forgangsröðuninni heldur en einstök viðskiptasambönd.