Samband íslenskra framhaldsskólanema

Ályktun 2. stjórnarráðsfundar 3.stjórnar S.Í.F

Samband íslenskra framhaldsskólanema hélt stjórnarráðsfund helgina 12.-14. febrúar þar sem við unnum í vinnuhópum og rituðum niður ályktanir fundarins.

Við störfum sem hagsmunasamtök framhaldsskólanema og vinnum að því að skapa jafnan grundvöll fyrir alla framhaldsskólanema, hvort sem iðnnema eða bóknámsnema.

Á fundinum sem haldinn var á Steinsöðum í Skagafirði var rætt um mál framhaldsskólanema, stöðu þeirra í samfélaginu og það sem við teljum að betur mætti fara.

Með þessu skjali viljum við vekja athygli á skoðunum framhaldsskólanema og vinna sem best er eftir þeirra hugsjónum.

Málin sem tekin voru fyrir eru Frí og frjáls menntun, Réttindayfirlýsing framhaldsskólanema, iðnnám, fordómar og staða Sambands íslenskra framhaldsskólanema.
Ályktanir okkar eru þessar;

Frí og Frjáls menntun

Frí og frjáls menntun er framtíðarmarkmið sem Samband íslenskra framhaldsskólanema mun stefna að.

Við teljum að frí menntun feli í sér niðurfelld skólagjöld, frían mat á skólatíma og bækur útvegaðar af skólunum. Við teljum þetta sporna við brottfalli þar sem nemendur neyðast ekki til að hætta í námi til að fara út á vinnumarkaðinn sér til framfærslu. Enda teljum við ástæðu til að nám sé viðurkennt sem full vinna.

Við teljum undirstöðu frjálsrar menntunar vera persónulegt nám þar sem nemandinn hefur meira vald og val yfir samsetningu eigin námsbrautar. Nemendur hafi svigrúm til að velja fög í samræmi við framtíðarplön. Það myndi einnig sporna við brottfalli þar sem hver og einn lærir eftir eigin áhugasviði.

Við teljum þörf fyrir betri og persónulegri námsráðgjöf þar sem hver og einn er skyldugur til að hitta námsráðgjafa minnst tvisvar á önn. Þar yrði litið á stöðu mála, framtíðarplön og almenn líðan tekin fyrir auk þess sem ákveðið er hvort þörf sé á fleiri tímum. Það bíður upp á betri stuðning við nemandann og eftirfylgni. Til að sinna þessari persónulegu ráðgjöf fullnægjandi teljum við ekki álitlegt að hver námsráðgjafi sinni fleiri en 200 nemendum.

Kveikjum á perunni!

Við teljum Réttindayfirlýsingu framhaldsskólanema mikilvægt skjal sem vert er að fylgja og kynna sem best. Undirstaða Réttindayfirlýsingarinnar er jafnrétti til náms, lýðræðislegt og fordómalaust skólasamfélag þar sem réttindi og skoðanir nemenda eru virtar.

Við teljum rétt að kynna yfirlýsinguna fyrir framhaldsskólanemum, til dæmis í lífsleiknitímum. Við teljum mikilvægt að nemendur séu meðvitaðir um réttindi sín og starfsemi SÍF svo þeir viti hvert þeir geta leitað sé á þeim brotið. Við viljum vera með persónulega og hnitmiðaða kynningu svo hún höfði sem best til allra og vekji áhuga.

Við teljum að rétt sé að upplýsa nemendafélög hvers skóla um innihald réttindayfirlýsingarinnar svo að þau geti upplýst nemendur í skólanum.

Við viljum fá ákveðnar greinar undirritaðar og staðfestar af Mennta- og menningarmálaráðherra svo hægt sé að vísa í þær, þyki ástæða til. Einnig munum við sækjast eftir stuðningi frá Mennta- og menningarmálaráðherra í að nálgast okkar framtíðarsýn.

Forvarnir

Við teljum fordóma gegn framhaldsskólanemendum viðvarandi vandamál og teljum tíma til kominn að bæta úr því. Fordómar koma fram í ýmsum myndum og þarf að taka á hverjum lið fyrir sig.

Fordómar gegn iðnnemum koma fram hjá nemendum, kennurum sem og samfélaginu í heild. Iðnnám virðist almennt sett á lægri stall en bóknám og teljum við það ekki eiga við rök að styðjast. Við teljum mikilvægt verkefni að eyða þessari mismunun og að iðnnemar verði virtir að vettugi.

Einnig þykir okkur vert að undirstrika þá kennsluaðferð að hvetja nemendur áfram fremur en að ávíta og draga úr námsáhuga, sérlega hjá nemendum sem eiga í námsörðuleikum.

Við teljum forvarnir í formi hræðsluáróðurs ekki áhrifaríkar og viljum fremur styðja forvarnir í formi fræðslu.

Við teljum ástæðu til að beita okkur fyrir betri umfjöllun um framhaldsskólanemendur. Þar sem þeir hafa hingað til sætt slæma og uppblásna fjölmiðlaumfjöllun sem hefur slæm áhrif á ímynd nemenda í samfélaginu.

Að lokum teljum við rétt nemenda að leggja mat á kennara og kennsluaðferðir þeirra. Námið á að vera í þágu nemenda og því liggur beint við að nemendur fái að hafa áhrif á framvindu þess.

Við teljum brýna nauðsyn að skilgreina ábyrgð skólameistara, líkt og tekið var fram í framhaldsskólalögunum 2008, til að nemendafélög framhaldsskólanna geti sinnt fullnægjandi starfi.

Starfnám á Íslandi

Ýmis vandamál eru undirliggjandi í starfs- og iðnnámi. Þar má nefna mismunun á milli brauta sem og yfirfullar kennslustundir.

Eitt stærsta vandamál iðnnema er starfsnám þar sem vinnuveitendur nýta sér þekkingarleysi starfsnema og brjóta á réttindum þeirra. Við viljum auka þekkingu, opna umræðu og auka upplýsingaflæði um starfsnámssamninga.

Við teljum mikilvægt að auka þátttöku og vægi iðnnema innan SÍF. Einnig viljum upplýsa iðnnema um réttindi sín og möguleika, til að mynda lánshæfni iðnnáms í Lánasjóði íslenskra námsmanna.

Við viljum efla skilning almennings og skólastarfsfólks um að iðnnám er ekki seinni kosturinn gangi nemendum illa í bóknámi, heldur fullgilt og krefjandi nám á öðru sviði.