Samband íslenskra framhaldsskólanema

Ályktun fulltrúafundar nemendafélaganna

17. apríl 2010

Fulltrúafundur nemendafélaganna var haldinn í Hinu Húsinu, Pósthússtræti 3-5, helgina 16-17 apríl 2010. Eftirfarandi eru ályktanir fulltrúafundar nemendafélaganna.

Komandi sumar – Atvinnuhorfur ungs fólks í sumar

Fulltrúafundur nemendafélaganna ályktar svo að stíga verði einhver skref til að sporna við yfirvofandi atvinnuleysi ungs fólks í sumar.

Vegna núverandi ástands í samfélaginu og á vinnumarkaðinum, teljum við stefna í að ungt fólk, 16 – 25 ára, fái ekki atvinnu sökum núverandi ástands á vinnumarkaði og hafi ekki efnahagslega bakgrunn til að stunda sumarskóla, þar sem kostnaður á bakvið hverja einingu er afar hár.

Nauðsynlegt er að ungt fólk hafi eitthvað fyrir stafni, að þau geti átt í reglubundnum samskiptum og vinni að ákveðnum markmiðum eða verkefnum sem skila af sér. Við teljum það geta spornað við þunglyndi og félagslegri einangrun.

Við teljum að til þess að það sé mögulegt þurfi ungt fólk að fá samastað og aðstöðu til að geta unnið að skapandi verkefnum eftir eigin höfði og áhugasviði. Það getur síðan nýst þeim í áframhaldandi námi eða á ferilskrá seinna meir. Við réttar aðstæður gæfist þeim tækifæri til að skapa eigið lítið samfélag sem byggir á samvinnu, frumkvæði og sköpunargleði.

Framkvæmd

Nú þegar hefur þessi hugmynd verið framkvæmd og tókst vel til. Árið 2009 fékk ungt fólk aðgang að Austurbæjarbíó og fékk þar að spreyta sig á hverju því sviði er lysti. Þar hjálpuðust allir að við að viðhalda og bæta aðstöðuna og framkvæmdu hugmyndir í góðum félagsskap.

Við teljum að byggja ætti á þessum grunni og gera enn betur. Stuðla að enn meiri þátttöku meðal ungs fólks sem og leita út á land. Auk þess að hafa mjög fjölbreytta möguleika sem henta mismunandi hópum fólks.

Hugmyndir af verkefnum og viðburðum eru fjölbreytt námskeið, sumarleikrit með tilheyrandi umfangi, söngkeppni, sveitaball, blaðaskrif og útvarpsþættir ungs fólks, handverk, uppgerð húsgögn, tölvuviðgerðir, fatahönnun og svo framvegis eftir hvers höfði. Auk þess verði aðstaða til þess að koma saman yfir heitum kaffibolla og eiga í áhugaverðum samræðum við fólk frá öllum áttum.

Leitað verður eftir styrkjum og þeim deilt niður á verkefnin eftir þörfum. Hráefni og aðstaða er því til staðar og þar með gott svigrúm til að framkvæma hugmyndir sínar.

Sýningar og aðrir viðburðir verða haldnir samkvæmt ákvörðun hvers hóps. Í lok sumars verður haldin uppskeruhátíð og fjáröflun þar sem öll verkefnin verða sýnd og afurðir seldar. Ágóði hátíðarinnar fer í lokaskemmtun samkvæmt óskum þátttakenda sem og aftur í styrktarsjóð verkefnisins.

Til að slíkt sé mögulegt þarf að framfylgja ákveðnum skrefum til að nálgast þetta markmið;

• Könnun verður send í framhaldsskóla til að athuga áætlanir nemenda næsta sumar og áhuga á verkefninu.
• Efla verður til samstarfs við aðrar hagsmuna- og æskulýðshreyfingar.
• Talað verður við styrktaraðila og verkefnið kynnt.
• Mikilvægt er að hafa öflugan og traustan talsmann sem gæti talað fyrir verkefninu.
• Efla til samstarfs við áhrifafólk innan stjórnar Reykjavíkurborgar til að auðvelda aðgang að húsnæði.
• Tryggja aðstöðu.
• Kynning verður að vera markviss og skýr og ná til allra nemenda.
  • Nemendafélögin láti orðið berast, setji upplýsingar inn á síður nemendafélaganna og sendi póst á nemendur, sé það mögulegt.
  • Verkefnið verði kynnt á facebook og öðrum samskiptasíðum, sem og með auglýsingum eða tengil á vefmiðlum.
  • Einnig teljum við áhrifaríkt að ná til foreldra, þá líklegast í gegnum fjölmiðla.
  • Plakötum verði komið upp á fjölförnum stöðum og dreifimiðar sendir í hús, sé það mögulegt.

Sumarskóli

Að lokum teljum við mikilvægt að þeir sem það kjósi geti haldið áfram námi yfir sumartímann. Í komandi könnun verður áhugi á slíku því einnig kannaður, niðurstöður birtar og komið áfram til yfirvalda.

Sumarskóli og fjarnám hefur orðið fyrir áhrifum niðurskurðar í menntakerfinu og þarf því að aðgæta hvort slíkt verði í boði. Sé ekki svo teljum við mikilvægt að þrýsta á Mennta- og menningarmálaráðuneyti sem og skólastjórn að endurskoða ákvörðun sína.

Ábyrgð skólameistara

Fulltrúafundur nemendafélaganna ályktar svo, að skilgreina þurfi betur lög í 39. gr. í lögum um framhaldsskóla, þ.e ábyrgð skóla á nemendafélögum. Þetta teljum við nauðsynlegt til að forðast frekari ágreiningsmál milli nemenda og skólastjórnenda. Fulltrúafundur nemendafélaganna leggur til að komið verði á samráðsvettvangi til þess að skilgreina þessi mál betur.

Vel mætti auka vægi nemenda innan skólanefndar, þar sem þeir hafa nú þegar málfrelsi og tillögurétt en hafa ekki fengið að setja mark sitt á starf nefndarinnar.

Einnig er talið æskilegt að komið verði á reglulegum samráðsfundum nemendafélaga og skólastjórnenda til auka skilning, samskipti og samstarf.

Fulltrúafundur nemendafélaganna ályktar að nemendafélag ætti að vera rekið með ábyrgð á eigin fjármálum sínum en skólastjórn megi grípa inní ef nemendafélagið er rekið í tapi eða stefnir í það. Fjármálastjórar skóla þyrftu að hafa reglulegt eftirlit með fjármálum nemendafélaganna til að sjá til þess að lögum og reglum sé framfylgt.

Forvarnir

Fulltrúafundur nemendafélaganna ályktar svo að forvarnir í framhaldsskólum séu afar mikilvægur partur af öllu skólastarfi.
Jafnframt teljum við að forvarnir ættu að vera jákvæðar, uppbyggjandi, persónulegar og opnar. Fólk ætti að geta tjáð sig að vild og fengið hreinskilið og upplýst svar við þeim spurningum er kviknað gætu.
Við teljum að forvarnarfræðsla ætti ekki eingöngu að snúast um áfengi, eiturlyf og tóbak heldur einnig ætti að fræða ungt fólk um andleg málefni eins og þunglyndi, anorexíu og fleira.

Forvarnarfræðsla hefur litið lægra halds í garð fullorðina og einungis beint að skólastjórnendum og nemendum.Við teljum að forvarnarfræðsla ætti að beinast meira til forráðamanna, sérstaklega í sambandi við fíkniefnaneyslu þar sem forráðamenn væru fræddir um þau ummerki sem benda til þess að barn þeirra gæti verið komið út í fíkniefnaneyslu.
Við teljum að fíkniefnaleit í núverandi mynd sé ekki forvörn, við teljum að hún sé ekki að fræða neinn heldur eingöngu láta ungt fólk vita á niðurlægjandi hátt að þau komist ekki upp með það að vera með fíkniefni í skólanum.

Við teljum að kenna þurfi ungmennum sjálfstæða og gagnrýna hugsun, til að gera þeim auðveldara fyrir að taka sjálfstæðar ákvarðanir og læra að treysta eigin dómgreind, frekar heldur en að láta undan hópþrýstingi eða annarra samfélagslegra hvata.

Við teljum að það að hafa eitthvað fyrir stafni sé áhrifarík forvörn. Skipulögð klúbbastörf í skólum eru gott dæmi um það. Það að einstaklingur finni sér einhvað að gera sem hann hefur áhuga á og getur sinnt komi í veg fyrir að einstaklingurinn lendi í aðstæðum sem gætu orðið honum skaðlegar.

Notkun áfengismæla er ekki fordæmd en lögð er áhersla á að áfengismælar séu ekki misnotaðir eða notaðir í hræðsluáróður en megi vera notaðir sem úrskurðarvald.